政情：黃楚標禁旗下飛機赴日
日本大地震及海嘯已發生個多月，大家關心災民之餘，同時擔心日本核輻射擴散。早前喺深圳成立公務機公司嘅「深圳王」東海集團主席黃楚標，早前就因應日本核輻射擴散情況而發出「禁飛令」，下令公司旗下六架私人飛機禁飛日本航線，預計最少半年後才會復飛。
標哥日前出席一個活動時話，旗下飛機禁飛日本，主要擔心飛機喺日本升降時會接觸到輻射塵，佢間公司話晒都從事服務業，乘客安全及健康最重要喎。唔單止咁，標哥自己都係穩陣派，聲言暫時戒食日本菜，總之安全至上。
雖然目前香港繼續維持將宮城、福島、茨城及岩手縣列為黑色外遊警示，但港人對日本仍念念不忘，所以今個復活節都有幾個旅行團出發去日本，到遠離災區嘅北海道、九州等地區。不過，標哥就斬釘截鐵話暫時唔會去日本旅行，改為多啲到內地喎。總之鹹魚青菜，各有所愛啦。