區議會選舉將於年底舉行，各政黨爭位愈來愈激烈，好似力爭翻身嘅民協，積極派人參選之餘，同時受到狙擊。繼人民力量派人同民協爭位外，連自由黨都踩入深水埗挑戰民協，日前更由黨主席劉健儀領軍，以「關懷活動」名義到上白田選區派發叉燒飯及皮蛋瘦肉粥，令班街坊長者笑到見牙唔見眼。
據地區人士透露，今次已經唔係自由黨第一次喺嗰區派食物，舊年年底已經派過嘉美雞、早排亦派過叉燒飯，每次反應都唔錯，吸引大批長者排晒隊。自由黨被人笑稱「富貴黨」，皆因多商界猛人，做飲食業都唔少，派食物當然冇難度啦。
除咗劉健儀外，副主席周梁淑怡前幾日亦去咗葵涌邨派叉燒飯，仲派成二百七十盒添！
自由黨落區密密做，連民協老巢都係咁攻，擺明就係想一雪前恥啦！相反民協老巢畀人正面猛攻，又要擔心畀人民力量喺背後扯後腿，睇怕民協嘅靈魂人物馮檢基有得震冇得瞓，要想辦法應付至得嘞。