政情：未夠秤義工踩袋巾傑場
公文袋撐加煙稅激起煙民不滿，「稅債票償大聯盟」更連番狙擊該黨黨魁梁家傑。大聯盟早前清明節到袋巾傑嘅藍田辦事處「喊魂」後，又趁尋日復活節假期，帶同十多名成員及巨型復活蛋賀卡，到袋巾傑嘅樂富橫頭磡邨辦事處「贈興」，話希望對方可以喺呢個長假期內「良心復活」，唔好再堅決支持加煙稅，以免助長私煙喎。
不過，最搞笑嘅係，大聯盟嘅一班義工，好多睇落好似未夠秤，而且有人更承認自己唔係煙民添。大聯盟成員吳健華都承認，佢哋班義工唔係全部都夠十八歲，但強調全部都係自發嚟做義工幫手喎。
摷垃圾桶執煙盒做統計
現場所見，呢班義工好落力，幫手摷垃圾桶執拾棄置煙盒，收集後以推算私煙嘅比例，尋日執到嘅首四個煙盒，已有一包係免稅煙。
大聯盟話會喺下月二日開記招，總結收集結果，再同政府早前公布嘅私煙數目比例作比較，話畀袋巾傑知撐加稅等於撐私煙。