政情：邱副減速論 車主鬧爆
「史上最廢」財政預算案雖然以低票通過，但係手尾陸續有來，好似增加汽車首次登記稅，立法會幾大黨派都話唔支持，形勢岌岌可危。觀乎近期政府提出嘅加車稅理據，可謂進退失據，運輸及房屋局副局長邱誠武前日仲廢噏，話當局調查到各區嘅車速減慢，顯示交通擠塞惡化。呢個謬論一出，即惹來車主網民圍插，有車主鬧爆邱副係火星人，九唔搭八。
拒絕讓步 群起怒插
預算案聲稱宣布大幅加車稅，係為咗控制私家車數目增長。負責擔起加車稅大旗嘅邱副，第一次上立法會時，已經靠嚇話四年後會增多十萬架私家車，就算只係百分之二、即是二千架車，駛晒上馬路已經等於十公里車龍，足以塞爆彌敦道由尖沙咀去到油麻地之間南北行全部行車線。呢番說話一出，當時被各界鬧爆，點知佢唔識死，前日再爆廢話。
前日立法會審議加車稅，對於多個黨派提出三點讓步方案，包括豁免加稅前買咗車嘅車主、環保車，同埋一換一嘅車主，可惜政府依然企硬，拒絕讓步。邱副更喺會上為加車稅辯護，話香港各區嘅車速減慢，代表交通擠塞問題惡化，所以一定要透過加稅嚟控制私家車數目，聽到班議員火都嚟埋，群起鬧醒邱副，同時亦辣㷫好多車主，紛紛喺網上怒插。
有網民喺香港討論區上大鬧，邱副應該喺放工時間去旺角彌敦道、灣仔軒尼詩道視察吓，究竟係巴士或是私家車塞住條路，跟住仲好氣憤咁話：「邱誠武係乜水呀，火星人嚟㗎……真係九唔搭八！」又有網民揶揄邱副言論係「山草藥」噏得就噏，覺得車速慢咗係因為多咗影快相，所以少咗人超速。
倡官員用集體運輸
有網民提議，所有政府官員都要使用集體運輸工具，減少用政府車去買餸及接放學，又或者加牌費、檢討吓巴士路線，減少一部又一部空載巴士，再唔係就少啲整路或者夜啲先整，總之就百花齊放。
其實呢次加車稅之所以頭頭碰着黑，咪又係政府推動政策之前唔夠深思熟慮，兼且無做好諮詢工作囉！連普羅大眾都有咁多諗頭，點解坐喺冷氣房嘅高官又諗唔出呢？每次都要搞到社會好大反彈，然後就嚟個急轉彎，難怪特區政府民望一直沉底喇！