中環出更：素顏舒淇超市掃零食
性感女神舒淇部新片《不再讓你孤單》，下個月將喺兩岸三地上映。忙完拍戲，終於可以抖抖。佢早前返回老家台北，與媽咪把臂同遊日月潭之後，轉過頭又現身香港，前日素顏行超市及百貨公司打發時間，勁掃零食兼睇靚衫，心情相當輕鬆。
當日舒淇收起性感，穿上T恤、牛仔褲及長褸，前日晏晝與助手閒逛中環。首站係ifc超市City'Super，見佢刻意戴上粗框眼鏡，又將西瓜帽拉近眼眉位置，加上無化妝，少啲眼力，都認唔出係佢。
舒淇喺超市左巡右巡，似乎冇乜心水。期間行過凍肉櫃時，被冒出嘅陣陣強勁冷氣吹到起雞皮，即時將手交疊胸前，行快兩步。睇唔出，平日以性感示人嘅舒淇，原來都幾怕凍。不過，當佢行到零食櫃前，即雙眼發光，三扒兩撥掃滿一車零食及飲品，莫非準備開Party？
用閃令令Hello Kitty銀包
之後，舒淇行去收銀處排隊畀錢。見佢一手拎個閃令令銀包出嚟，睇真啲，原來係冧爆萬千少女嘅Hello Kitty銀包，上面鑲滿Bling Bling閃石，夠晒可愛。原來，性感女神都有童真一面，寧願用少女銀包，都唔揀名牌貨，果然樸實。
畀完錢，助手負責拎嘢。卓妮想話上前傾幾句，點知舒淇耍手擰頭，同助手快閃，行入一間百貨公司繼續shopping，睇吓衫、睇吓手袋，不知幾寫意。
卓妮