政情：肥亨重遊舊居多感觸
得人恩果千年記，年少家貧嘅中策集團主席馬時亨，當年好彩有舅父支持，先可以讀到大學，對於呢份恩情，佢至今仍銘記在心。肥亨日前接受電視節目訪問，重遊成長嘅北角書局街舊居，勾起唔少童年點滴，提起當年擔起一家之「煮」嘅重擔及舅父曾啟榮（藝人曾志偉嘅爸爸）供佢讀大學時，更加感受至深。
肥亨抵達舊居美輪大廈時，即憶起童年歲月，佢話當年一家六口住喺百幾呎板間房，要同鄰居共用廚房及廁所。肥亨十幾歲嗰陣爸爸就過身，媽咪要母兼父職返工搵錢，做老大嘅肥亨就要負責買餸煮飯及照顧弟妹。肥亨話，原本佢中學畢業後就要工作幫補家計，但好彩有舅父支持，佢先至有機會讀到大學。
肥亨又到母校香港大學緬懷拍拖往事，雖然佢同太太王培琪（Linda）當年一齊讀港大，但原來Linda嫌佢老土，令兩人未能撻着，直到後來二人喺加拿大重遇先至開始拍拖，並結為夫婦。肥亨仲自爆情史，話當年嘅拍拖對象，有一個係港大女生，證明佢嘅情史豐富，唔知Linda知唔知情呢？