政情：民間電台踩場反被玩
曾經多次進行非法廣播而遭檢控嘅民間電台又有新搞作，台長曾健成（阿牛）同立法會議員梁國雄（長毛），尋日帶同一班義工到廣播事務管理局秘書處開會，嘗試了解申請數碼廣播牌照嘅方法及要求。負責擔任廣管局秘書處工作嘅影視及娛樂事務管理處亦不敢怠慢，派出助理處長鄭青雲應付呢班「貴賓」，仲令阿牛等人敗興而返。
話說當日鄭青雲嘅態度謙恭，而且笑容滿臉，可惜答嘅始終都係官樣文章，揸住守則同法律照本宣科，即使幾努力回應阿牛同長毛嘅提問都冇用，因為佢始終無話事權。鄭青雲更表明，現時香港可供數碼廣播嘅頻譜已經滿晒，除非電訊管理局肯開放頻譜，否則即使份計劃書做得幾好都唔使旨意獲批牌照喎。最終搞到長毛提早離場，以示無奈。
阿牛就話，民間電台唔會理咁多，繼續照舊申請牌照，雖然明知唔會成功，但亦會努力爭取喎。