政情：高靜芝撐婦女退休保障
相信好多市民都諗緊點使政府派發嘅六千元，專為基層婦女爭取權益嘅「婦女動力基金」就行先一步，尋日發起募捐行動，呼籲市民捐出六千元或部分款項，支持佢哋推動婦女爭取全民退休保障。婦女事務委員會主席高靜芝（Sophia）現身撐場，仲自爆自己冇受到退休保障覆蓋，所以要支持一套更加完善嘅退休保障制度。
Sophia話，佢十一年前退出職場，所以依家徹底跌出任何退休保障網，就算佢出任財務匯報局主席，都冇公務員享有嘅退休保障福利。佢話婦女為咗照顧家庭，為社會貢獻年輕歲月，政府好應該為呢班無酬嘅家庭工作者建立完善退休保障網，或喺現有強積金制度下，令非在職人士都可以供款，為將來積穀防饑。
「婦女動力基金」行政總監杜潔麗話，佢哋已邀請多名知名人士出任「撐婦女，爭退保」募捐行動嘅動力大使，包括立法會議員劉慧卿、工聯會副會長陳婉嫻、前灣仔區議會主席黃英琦等人，佢哋都應承捐出全數六千元或部分款項，為婦女建立一個退休保障制度。