政情：單雞卿姐為選特首反枱
民主黨高層日前喺上水開腦震盪會搞到不歡而散，除咗無法敲定參選區議會嘅名單外，對於係咪派人參選下屆特首選舉問題，更爆發爭拗。消息人士透露，當日大家花咗大部分時間討論特首選舉嘅參與程度，兩名副主席單仲偕（
雞）同劉慧卿各執一詞，前者認為要積極參選，以彰顯泛民主派第一大黨嘅地位，後者就堅拒參與小圈子選舉，結果搞到反枱收場，擇日再議。
卿姐認為，雖然下屆特首選委會已經由八百人增加到一千二百人，但依然係小圈子選舉，推崇普選嘅民主黨根本唔應該落場，否則會令市民誤以為佢哋幫下屆特首抬轎，變相將小圈子選舉制度合理化。其實卿姐擔心不無道理，事關早有政界人士分析，如果民主黨派人參選特首，建制陣營就毋須派出兩人參選營造競爭局面，對已被欽定嘅特首人選非常有利，並指此舉隨時招人口實，畀激進泛民陣營攞嚟做攻擊目標，得不償失。
不過，雞就有唔同觀點，認為民主黨身為最大反對黨，應該直接同下屆特首對決，否則一旦有其他泛民政黨參選，民主黨就會陷入尷尬局面，因為唔支持就變得冇義氣，支持咗又可能重蹈○七年支持梁家傑參選特首嘅覆轍，選票一去冇回頭，等同拿石頭掟自己雙腳。加上特首選舉正正係區議會選舉同立會選舉中間，如果參選就可以食住個勢，保持知名度，對兩個選舉都有幫助。
其實卿姐同雞早前先因為全民退休保障問題喺黨內駁過火，前者出名比較激進、草根同反建制，後者相對保守、親商及親建制，今次開拖可謂冰封三尺，非一日之寒。
何俊仁中立 裏外不是人
估唔到腦震盪會最終變成高層爭拗嘅戰場，但呢件事可謂公說公有理，婆說婆有理，拗咗幾個鐘都冇結論，要押後處理之餘，仲搞到喺議題上中立嘅黨主席何俊仁裏外不是人。知情者話，其實將問題拖延都唔係辦法，因為點都要喺選委會選舉報名前敲定係咪派人參選，如果唔係好難說服盟友參選選委會。不過，眼見雞同卿姐炒大鑊，唔少人都認為要召開會員大會，一人一票落個定案，如果唔係有乜決定都好，肯定會令其中一人唔順氣喎。