中環出更：陳詠梅晒廚藝名人飽口福
高官退出官場，各自各精彩。前入境處助理處長陳詠梅（Helen）就變身廚神，尋日現身「第二屆香港食品嘉年華」，揸起鑊鏟表演拿手煎蛋角，在場嘉賓食到舔舔脷。Helen入得廚房，出得廳堂，但問到疑似男友廉政專員湯顯明試過佢啲手勢未，Helen就封嘴唔講。
由廠商會舉辦嘅食品嘉年華，尋日朝喺旺角花墟公園揭幕。廠商會副會長兼展覽服務有限公司主席施榮懷一馬當先，帶商會班兄弟穿梭會場「搵食」，試飲即榨菠蘿檸檬果汁，又試食雙皮奶蛋撻，令大家飽到捧住肚皮。
試食只係前菜，大會仲請來城中名人煮兩味。Helen同深水埗民政事務專員陳穎韶組成「雙陳」配，示範煎蛋角畀大家試食。至於擔任美食大使嘅藝人蘇玉華就煮椰香咖喱雞，香氣飄滿會場。
Helen廚藝功架十足，原來全靠細個夠為食，無師自通愛煮兩味。佢天分頗高，每次出街食飯嘗到特別菜式，回家後便依樣畫葫蘆。今次煮煎蛋角，認真算係小兒科。
大輝度水掃貨
退休後嘅Helen，生活零壓力，閒來學古琴、練書畫，又返港大讀佛學碩士，但佢不忘將快樂分畀別人，同施榮懷及友人組成「香港提升快樂指數基金」，並擔任義務總幹事。講到感情生活，Helen就輕描淡寫話冇乜特別喎。
廠商會立法會代表林大輝忍住牙痛去撐場，佢話爛牙仍然發炎，未剝得，食過醫生開嘅抗生素，點知肚屙，急速消瘦五、六磅。不過，大輝依然為食，一度想大出血搜購美食，可惜身上只有信用卡，拿拿臨問朋友借來三百元掃貨。
施榮懷話，呢排食品狂加價，但商會堅持以筍價益街坊，希望市民買到平嘢食，同家人及朋友分享歡樂喎。
卓妮