洪 欣：「個仔仲未睇過條片（莫少聰被捕片段），因為個仔剛剛放復活節假期，同老公一齊上咗嚟大陸陪我，（擔唔擔心個仔睇到條片？）都無辦法，希望個仔永遠都睇唔到，（莫少聰始終係佢生父，怕唔怕呢件事影響到個仔？）個仔從無見過佢，都唔識佢，我個仔好憎人食煙，佢見我老公食煙，都見一包沒收一包，更何況係吸毒。」
熊欣欣：「我本來想去探阿聰，但問過話唔可以探，我唔想咁高調，擔心影響到佢。」
袁詠儀：「十幾年前同孫興合作過拍戲，當時孫興係一個正能量嘅人，估唔到佢有啲咁嘅嗜好，希望佢經過今次教訓之後唔會再犯，做番以前我認識嘅孫興，希望有關部門幫佢戒除毒癮，渡過難關。」
張智霖：「我一直同孫興係朋友，覺得喺呢個時候唔應該講太多，我自己就唔會去呢啲應酬，但係工作咁辛苦，每個人都各自各生活、取向，（有指若判藏毒或販毒，最高刑罰係死刑！）我覺得每個政府都應該畀人改過自新嘅機會，希望可對孫興同莫少聰從輕發落。」
杜汶澤：「我明白吸毒係錯，但唔明白點解要公開播放佢哋被捕嘅短片，剝奪咗佢哋嘅尊嚴。」