政情：張學明淡出新界社團聯會

新界鄉議局副主席兼新界社團聯會會長張學明，喺新界嘅分量舉足輕重，連續兩屆勝出新界西直選。不過，學明尋日同傳媒聚會時就自爆，嚟緊五月新界社團聯會換屆，佢會同現任理事長溫悅球雙雙退下，畀機會班年輕人上位。學明強調，呢個決定係出於自願，因為佢已年屆六十歲，認為呢個時候退出係好時機，等班後生仔打正聯會旗號出選。

有邊啲後生仔可以上位呢？學明就舉咗幾個例子，包括現屆常務副理事長陳勇、立法會議員陳克勤及荃灣區議員陳恆鑌等，當中以陳勇最資深。不過，有傳聞話學明退落嚟，係想出選新界東嘅陳克勤同新界西嘅陳恆鑌登上聯會高層後，好讓聯會嘅票源過畀佢哋。至於會長個位邊個接任，學明就始終唔肯講，一切要等選舉決定喎！

鄉議局六月會舉行換屆選舉，學明話會積極考慮參選。對於有傳沙田鄉委會主席莫錦貴有意同佢拗手瓜爭做副主席，學明就強調事前冇聽過，仲話現時言之尚早，唔使咁早講呢啲事喎！

Money18免費即秒股票報價網站現推出8升級功能，財經資訊，實時實發！