政情：焦媛請議員睇性喜劇
平時喺議事堂月旦政事嘅立法會議員生活枯燥，加上對住淪為看守政府嘅特區政府，精神壓力隨時到達臨界點，好應該搵啲節目調劑吓。咁啱有劇團即將上演一齣「瘋狂性喜劇」，仲邀請議員去睇。齣劇講偷情，點解又會請議員去睇呢？
齣劇係由焦媛實驗劇團製作，佢哋形容齣劇「笑到你Ｏ嘴，笑到你流鼻水」，內容係講述一對夫婦為咗幫老友「偷食」，借出自己間大屋，點知產生誤會多多，形成錯綜複雜嘅多角關係，裏面嘅故事情節，可能仲豐富同複雜過立法會內議員之間互相拉扯嘅情況。
既然係性喜劇，可能男議員興趣比女議員大，如果議員有偷情經驗，就更加會發出會心微笑。不過劇團方面話，之所以邀請議員去睇，係因為劇情提及劇中主角希望得到一位上海女作家同佢合作做生意，寓意依家香港都要靠內地，如果係咁，又可能多咗啲建制派議員去睇喎！