政情：項明生撐圍城獲殊榮
一向點子多多嘅Sony Computer Entertainment香港市場部總經理項明生（James），最近憑「亞洲遊戲展」天水圍招聘會嘅公關案例，喺香港公共關係專業人員協會（PRPA）主辦嘅首屆「香港公共關係獎」，奪得「企業社會責任」優異獎。
James話，呢個獎項令佢感觸良多，事關佢哋由四年前天水圍發生倫常慘案後，就率先喺當地搞招聘會，如今社會對天水圍嘅關注度下降，但佢哋依然年年照做招聘，唔因善小而不為，結果獲此殊榮，證實做好事始終有人留意。
講起支援新移民，James零舍有感觸，因為佢都係新移民，所以對政府派六千蚊嘅政策不敢恭維。佢話，派錢係一時，派唔到一世，六千蚊使晒之後又點呢？所以佢覺得畀新移民工作機會更加重要，呢啲支援先至有持續性。聽James講得咁好，真係將班高薪厚祿嘅政府庸官比下去。