政情：鼠王芬變身抽水芬
西九新動力立法會議員梁美芬（鼠王芬）尋日又出動抽水驗大腸桿菌含量，今次佢仲衝出佢嘅選區九龍西，抽水抽到去新界西嘅荃灣。其實香港三面環海，佢咁抽水法，隨時抽到過晒呢兩年嘅各級選舉都未抽完，不過抽驗結果有無參考價值，同埋是否可以持續吸引市民注意，就真係佢有佢嘅盤算嘞。
西九新動力同工程界社促會一月份喺土瓜灣馬頭角尾、海心公園對開同荃灣西鐵站、荃灣渡輪碼頭對開海面抽取海水樣本，發現土瓜灣避風塘海面嘅海水大腸桿菌含量係每一百毫升廿三萬個，同泳灘大腸桿菌可接納嘅標準，即每一百毫升六百一十個比較，超標三百七十七倍，而荃灣西對出海面海水大腸桿菌亦達每一百毫升四萬個，超標六十五倍。鼠王芬仲帶埋記者去到土瓜灣避風塘視察，去到海邊果然傳嚟陣陣臭味，仲有唔少垃圾。
含菌量超標幾百倍，聽落都幾得人驚，但其實鼠王芬尋日提出用嚟對照嘅可接納標準係泳灘嘅標準，希望佢唔好咁傻，諗住喺碼頭游水喇。