新聞處助理處長幾乎爆出收受巨額機票醜聞，好彩佢懸崖勒馬，先至冇事。新聞處助理處長吳葉潔英（Jean）月初出席一個團體聚會時，席間就係抽到兩張唔限目的地嘅商務客位機票，阿Jean喺眾目睽睽下收咗呢份頭獎。不過，佢第二日就將機票退番畀主辦單位，因為考慮到瓜田李下，都係要避一避嫌。
有與會者透露，阿Jean抽到嘅機票係當日嘅頭號大獎，佢中獎時都有啲愕然，與會人士就更加嘩然，因為如果張機票嘅目的地係一程過直飛美國紐約，價值就高達十八萬元，與會者話佢當時極速望一望在座嘅新聞處處長黃偉綸（Michael），Michael微微點頭後，阿Jean就上台領獎。不過，在席唔少人開始議論紛紛，認為公務員唔應該接受呢份厚禮，不然有損公正形象喎！
我哋向阿Jean求證，佢承認當日確有收咗兩張機票，但好快已經退番畀主辦單位，強調有依足程序去做，唔擔心惹人非議。咁點解佢收完又退番呢？阿Jean解釋話，當時席間嘅氣氛好好，大家見佢抽中都戥佢高興，如果硬生生退回禮物，就好似潑人冷水咁，所以暫時收咗先，佢又話自己唔係太喜歡旅行，而張機票有好多限制，例如規定要半年內使用，加上金額又高，所以最後決定退番畀主辦單位。
Michael就否認有默許阿Jean收禮，佢話公務員收取每份禮物都要填表登記，正常都要辦公時間先可以做到，所以喺晚宴收到嘅禮物，都會先攞返公司，按情況再向上司申報，就算上司批准，佢哋一般都會留起禮物作為部門內抽獎之用，好少會自己袋落袋喎。根據《防止賄賂條例》，公務員收取價值五百元以下嘅禮物，通常都會獲得批准，但五百元以上嘅就要經部門主管書面同意先攞得，但條例無明文禁止公務員參加抽獎。
中咗獎又要攞番出嚟，唔知阿Jean會唔會唔捨得呢？佢就笑笑口冇回應，但就透露今次係佢人生中第一次抽中獎。其實有冇禮物落袋並唔重要，抽得中已經係一種幸運，加上今次阿Jean揸正嚟做，樹立良好榜樣，輸機票贏名聲，算係有賺啦！