中環耳目:吳永嘉偕友刺身送茅台

港人特別鍾意食日本菜,好似中華廠商聯合會副會長吳永嘉(Jimmy),每逢參加完灣仔會展嘅畀面酒會後,最鍾意同三五知己到謝斐道嘅熊亭日本料理開餐。卓妮有日又見佢同香港珠寶玉石廠商會副會長陳日強(Sunny)喺嗰度食晚飯,兩人一邊食魚生,一邊飲茅台,不知幾盡興。

Jimmy同Sunny都係茅台發燒友,正係茅台令佢哋成為知心酒友。當晚Sunny特登出動北京人民大會堂嘅特供陳釀茅台到場,配上左口魚、池魚王及油甘魚腩等道地魚生。Jimmy話,佢好鍾意食魚,最叻係唔怕魚腥味,盛讚熊亭嘅左口魚刺身鮮甜口感好,池魚王刺身就夠晒爽口,油甘魚腩同茅台嘅味道仲好配襯添!

話派酒好過派錢

美酒佳餚當前,佢哋兩兄弟無所不談,講到財爺向市民派發六千蚊,Sunny幾杯落肚後有話直說:「派茅台好過啦!」兩人講起政經時事難免有拗撬,但係一提起茅台有幾香醇美味,兩兄弟就自然企埋同一陣線嘞。

卓妮

Money18免費即秒股票報價網站現推出8升級功能,財經資訊,實時實發!