中環出更:楊貫一慨嘆 靚鮑貴過鑽石

食品大幅漲價,市民買餸都要慳住荷包,鮑參海味更加唔在講,當中以日本鮑魚漲價最瘋狂,短短一個月間,價格已暴漲六成。何解咁瘋癲?「阿一鮑魚」楊貫一(一哥)話,日本海嘯唔止摧毀大批鮑魚養殖場,連製鮑老行尊亦遭殃,製鮑獨門技術幾近失傳。

一哥嘆謂,優質日本鮑已買少見少,未來嘗一口溏心鮑魚,恐怕貴過一粒鑽石。

究竟日本鮑魚供應有幾緊張呢?一哥日前出席博愛醫院董事局就職晚宴時,話連已故富商林百欣養子林建康都搵佢撲鮑魚,皆因林媽媽係超級鮑魚迷,不時搵一哥入貨,林建康話,貴貴都要買,最多食少啲。

李鋈發海嘯後入定貨

頂級靚鮑魚供不應求,一哥話,以日本六頭網鮑為例,海嘯前賣三萬八千元一斤,海嘯後急升至每斤六萬元;八頭網鮑就由每斤兩萬八,升至四萬元一斤,升幅平均四至六成,令人咋舌。

不過,一哥唔肯透露手上鮑魚存貨有幾多,但佢不諱言,從未見鮑魚供應量如此短缺,未來只有見步行步。

一哥近排又忙緊搞新舖,旗下日本料理「八重菊」早前急急斬纜結業,一哥再投入約五百萬元重整旗鼓,轉營高級西餐廳,佢滿有信心話:「喺邊度跌倒,就喺邊度起番身。」預計兩個月後開業。

博愛總理李鋈發早着先鞭,海嘯後大舉掃鮑魚,購入唔少日本吉品鮑及禾麻鮑。佢話,老前輩話佢知,製鮑師傅已買少見少,未來靚鮑難求,唔少內地豪客光顧佢旗下食肆「飯堂」食鮑魚,唔可以打開門口冇鮑魚賣喎!

青年事務委員會主席陳振彬(Bunny)都係鮑魚迷,聽見就快冇鮑魚食,佢話唔擔心:「冇日本鮑,咪轉食澳洲鮑或者南非鮑囉!」Bunny分析話,只要將日本製鮑技術套用喺澳洲或者南非鮑魚身上,應該都唔會差得去邊喎。

卓妮

Money18免費即秒股票報價網站現推出8升級功能,財經資訊,實時實發!