鬍鬚曾當初推出份預算案，全城鬧爆；其後，鬍鬚曾跪低再跪低，終於拋開「審慎理財」嗰件羊皮，露出慌不擇食嘅狼狽相，來個急轉彎大灑金錢，「史上最廢」預算案終低票過關。本來佢都係求過關啫，如今使命已達，佢又要求面子，覺得大派六千，理應人人讚好，個個話妙，誰知民望依然插水，於是化怨憤為怒氣，在網誌指摘泛民「因政治鬥爭」而投棄權票，喺議事廳內，投棄權票等於反對。
自己無能還要怨恨他人，鬍鬚曾有幾叻大家可思過半。自己份預算案衰到貼地，不反躬自省自己窩囊廢，不感恩咁都過到橋，反而怨三怨四，喂！係唔係男人嚟㗎？當年，某女星在金馬獎頒獎台上，熱淚盈眶地說出「我一定要把脫掉的衣服，一件一件穿回來」，老朽雖有點感動，事後又覺得那算得甚麼，如放在世界情色電影，那只是小兒科而已。
老朽之所以舊事重提，就係覺得鬍鬚曾連這位女星也不如，人家自強不息，演技大有進步，毋須靠脫也贏盡口碑。今鬍鬚曾只知怨恨，完全沒有「知恥近乎勇」的心態——下次誓把棄權、反對的票，一票一票贏回來，如此方為大丈夫！
梁啟超說，我們要學孔子的發憤忘食，便是學他的努力；要學孔子的樂以忘憂，便是學他的知命。知命和努力，原來是不可分離的，互相為用的，向來偉大人物無不如此。
當然，我們不奢望鬍鬚曾成偉人，只求他知命，放下不必要的怨氣，努力做好最後一份預算案，如此要求過分嗎？