民建聯尋日改選領導層，仲順便公布埋新口號，就係「一個有承擔嘅政黨」，同以前「一個有前景嘅政黨」雖然只差兩字，但就令人引起無限想像，唔通係最近民記成日畀政府跣，硬撐一堆不合理嘅政策，頓悟出保皇黨「已無前景、只有承擔」嘅大道理？冧莊黨主席嘅譚耀宗就話，改口號只係因為見到坊間部分政黨，有啲為反而反，有啲就淨係識得謾罵同破壞，無助整體社會發展，所以先改口號強調民記值得信賴，叫大家唔好諗咁多。
上屆立會選舉喺九龍西跑出嘅李慧琼，就取代退下火線嘅溫嘉璇當選副主席，係同期最早躋身領導層嘅新鮮人。
外界一般揣測，李慧琼升任副主席係為咗下年參選超級區議會鋪路，不過佢尋日就春風滿臉地否認，話參選係見到社會氣氛唔好，希望做多啲嘢為大家服務。至於選唔選超級議席，佢話黨至今都未有認真討論過，如果再參選立法會，佢嘅首選都仲係九西喎！