政情：四海關工會反ＡＯ空降
過去十二年海關關長一直由政務官即ＡＯ空降，最近又傳出現任關長袁銘輝夠期升職，最初傳五月有變動，其後又傳七至九月，仲話係由一名女ＡＯ接任做新關長，有指連姓氏都開埋，繪影繪聲，難怪四個海關工會要約見公務員事務局常秘黃鴻超，其實都係想探聽吓風聲，同埋表明反對再由ＡＯ空降做關長。
黃鴻超尋日同工會代表見面就大派定心丸，話未有任何關長調任嘅部署，又話會聽工會反對空降嘅意見。工會代表話，黃鴻超都係前關長，佢嘅講法，信住先喇。
公務員事務局之後出稿回應，話任命關長會用人唯才，又話海關關長會優先考慮內部提升，若部門未有「合適的人選」，才考慮從其他職系借調。上任關長湯顯明喺○七年調任廉政專員後，都講過「關長的評選是按照當局所需的人才而定，不是空降」，明明空降都否認空降，睇嚟雙方都係各自表述，空降問題仍疑團未解。