政情：坪洲新貴逼林偉強裸退
鄉議局副主席林偉強早前喺坪洲鄉事委員會主席選舉落敗，連帶喪失離島區議會當然議員及區議會主席之位。尋日鄉議局舉行執委會，新任坪洲鄉委會主席黃漢權，公開向包括林偉強在內嘅鄉議局領導申訴，批評政府拖延坪洲鄉委會修改規章。其實今次修章正正係針對林偉強，等佢無法以太平紳士身份進身坪洲鄉委會執委，等於要佢裸退，但台上嘅林偉強對有關發言全無反應，好似當聽唔到咁。
雖然林偉強被人當面暗寸，但鄉議局主席劉皇發嘅遭遇就啱啱相反。元朗約六條鄉嘅鄉委會正、副主席，尋日會後向發叔親手送上一封聯署信，話最近有報道指發叔萌生退意，唔再角逐連任鄉議局主席寶座，佢哋形容發叔「係新界人的龍頭」，加上新界正值「多事之秋」，「沒有龍頭便不是舞龍」，希望佢打消退休念頭，「繼續為新界人掌舵」。
發叔本人就話，仲未諗掂係咪喺六月一日角逐鄉議局主席改選，又話就算唔做主席，都可以繼續為新界人服務，佢嘅心意真係難以猜透。