政情：澳門銀河嚴選吉日開張
現時澳門大部分賭場都以做內地客生意為主，面對嚟緊內地五‧一勞動節黃金周長假期，確係豬籠入水，但銀河娛樂集團旗下嘅「澳門銀河」綜合渡假城，就偏偏揀咗喺下月十五日先至開張。集團副主席呂耀東（Francis）尋日出席午宴時承認，佢哋除咗唔想因為趕住開張而影響服務質素外，風水都係其中一個考慮因素。
五月十五最好日
Francis指出，今年五一仲算係農曆三月，三月係中國人清明節祭祖嘅日子，非必要都唔會選擇喺呢個月份搞開張，至於農曆四月當中，就以四月十三，即新曆五月十五日最好日，而且當日咁啱係星期日，用嚟搞開幕儀式就最適宜。
至於「澳門銀河」嘅酒店同賭場設計，Francis就強調係以方便客人為先，外貌美觀同風水都只係次要。佢話，雖然澳門有啲賭場酒店夠晒宏偉浩大，但客人要由房間行去食飯、買嘢、賭兩手甚至上廁所，都隨時會行到腳軟，甚至搭電梯亦要排幾輪隊。
同樣由佢出任副主席嘅嘉華集團，有數十年經營酒店經驗，喺設計上一定唔會有上述問題喎。