政情：政府司機谷爆起革命
正所謂「上樑不正下樑歪」，煲呔曾用人唯親，連帶佢團隊內嘅高官都好學唔學，請司機要請番自己友，令原有制度內勤勤力力有望升職做政府貴賓車司機嘅汽車司機，晉升前途都受到阻礙。代表呢班前途受阻嘅政府貴賓車司機工會日前再起革命，去信立法會轄下公務員及資助機構員工事務委員會反映不滿，批評政府只聘請外來人擔任貴賓車司機，令汽車司機無晉升機會。
政府自○二年引入高官問責制後，已對公務員晉升機會造成嚴重衝擊，由上至ＡＯ（政務官），下至政府貴賓車汽車司機都無一幸免。當年班司局長空降入政府時，部分高官已被揭發帶埋私人司機入政府，令班公務員司機減少晉升機會，之後更適逢○三年沙士及○八年金融海嘯，司機人手被凍結，班公務員司機晉升機會更加雪上加霜，當然政府照樣話之你啦。
不過，呢兩年經濟好轉，庫房水浸，政府就補聘過去多年凍結嘅司機人手，但貴賓車司機職位依然未有增加。據聞現時政府有四個貴賓車司機係私人司機，包括食物及衞生局局長周一嶽嘅司機喺周上任時跟埋過檔嘅，其餘三個都係用已退休貴賓車司機，所以下面班汽車司機只能署任貴賓車司機，但無機會晉升。
貴賓車司機向來都係高官最貼身嘅同事之一，必須要做好多年，確保身家清白兼且紀錄良好，保證唔會出賣高官私隱，但自從引入問責制之後，高官可用合約形式聘請無受過專業評核嘅司機。如果大家心水清，相信會記得當年前民政事務局局長何志平嘅司機，觸犯嚴重誠信事件，仲曾經因為販毒留有案底，試問如果循正規投考，恐怕都冇乜可能做到局長司機。近期就有某高官嘅司機喺內地個人行為不檢，最後為免影響該高官聲譽而辭職。
望取消外聘政策
政府貴賓車司機工會主席董兆安話，過去工會先後去信公務員事務局、政制及內地事務局反映不滿，但結果石沉大海，所以今次才發信去立法會申訴。董兆安強調，公務員司機受過專業訓練，無論喺工作經驗，或者係服務態度同誠信上都可靠，根本毋須外援幫手，所以佢哋好希望可以取消問責官員外聘司機嘅政策。如果政府對此問題再坐視不理，一旦班司機搞罷工行動，真係不堪設想喇。