中環出更：鄧慶治豚王排隊探囝囝班
城中名人爭相去朝聖嘅拉麵店「豚王」愈嚟愈受歡迎，但就苦了一眾排隊嘅捧場客，所以身為老闆嘅鄧振豪正努力搵新舖開分店，為粉絲提供一個更好開餐環境。日前一個下晝，卓妮見麵店人頭湧湧，仲見振豪嘅爸爸佳能高級副總裁鄧慶治（Mingo）企喺門口傾電話，同其他四、五個食客一齊等位。
主廚賑災未歸位
原來Mingo啱啱開完會，專程去探囝囝班，佢話振豪正忙緊籌備分店，依家喺銅鑼灣、灣仔同尖沙咀都搵緊舖位，希望搵到面積大少少嘅，可以做埋其他和食。不過，咪以為搵舖位難，原來請人仲艱難，事關佢哋想搵啲正宗日本廚師坐鎮，始終日本人對食物製作好執着，自然令食物水準更有質素。
講開日本廚師，「豚王」個主廚仲未歸位，事關主廚喺日本都有舖，之前返咗去日本一趟，不幸遇上地震，於是即刻走去賑災煮麵慰災民，原本打算本月初回港，但基於當地仲有好多災民需要幫助，所以主廚就想繼續留喺嗰邊做義工，改到本月底才回歸，難怪見振豪喺舖面跑出跑入做唔停喇！