中環出更：名媛「心蓮心」撐弱勢社群
女人心，海底針，女人嘅心思都係女人最明白。為咗協助婦女面對負面情緒及困難，由李錦記家族大新抱Mahnaz Lee及Adler珠寶董事總經理何彭慧嫻（Patti）創辦嘅慈善團體「心蓮心」，尋日喺港島一間五星級酒店舉行首次籌款午餐會，獲一眾城中靚女名太溫馨撐場，大家仲踴躍捐款，齊心協助城中姊妹站起來。
卓妮尋日見現身支持嘅政商界女強人、社交名媛逼爆現場，男士幾乎絕迹。包括香港基本法委員會副主任梁愛詩、中華總商會會長蔡冠深太太蔡關穎琴、仁濟醫院主席李文斌太太何芷韻（Amanda）、慕詩（Moiselle）老闆陳欽杰太太徐巧嬌等，印證女人足以撐起半邊天。
籌款辦課防悲劇
忙於招呼姊妹嘅Patti愈忙愈開心，佢話同Mahnaz一直想回饋社會，所以去年成立咗心蓮心，希望支援及鼓勵本港婦女。是次打頭炮籌款所得款項將用於「和諧之家」嘅「育兒援助計劃」，協助弱勢社群嘅婦女成為出色母親，包括開設課程分享管教子女同埋情緒管理技巧，以減少社會悲劇。
蔡關穎琴同藝人莫文蔚媽媽莫何敏儀好老友，兩人一見面就雞啄唔斷。莫太話，佢默默做慈善做咗幾十年，座右銘就係「雪中送暖」，所以見到Patti咁有心，二話不說支持到底。至於Amanda就特登嚟撐仁濟總理陳馬笑桃。Amanda話，嚟緊復活節冇打算出遊，因為老公有好多嘢做喎！
卓妮