政情：黑英拆穿教局西洋鏡
中學縮班風波愈演愈烈，多次公開力撐母校唔縮班嘅前天文台台長、英皇書院校友林超英尋日為政府把脈，話港府患上官員言而無信、行事偏離法制嘅管治疫症，仲話管治疫症唔應該畀佢蔓延。
林超英喺網誌力斥港府玩弄文字遊戲，佢話早前去信教育局，要求當局解釋英皇何時授權簽署縮班申請，不過教育局喺回覆裏面亂咁引用校管會章程，林超英話教育局回覆指，校管會章程寫明「校管會須聽從教育局常秘的指示及向其問責」，不過佢多次反覆細閱章程，搵嚟搵去都冇呢個說法，只係寫咗「校管會必須為學校表現向常秘負責」，而根據《教育條例》，係法團校董會須「為學校表現向常秘及辦學團體負責」。林超英話呢個指示絕對唔包括應當局要求減班，又話如果將條例理解成要聽從教育局常秘指示，咁唔會有辦學團體願意成立校董會。
其實港府患嘅唔止係管治疫症，仲係死症，當然唔應該畀佢蔓延，不過可惜嘅係，官員言而無信、行事偏離法制已經成為港府嘅風氣。