政情：象哥爆棠哥未開得枱
工聯會會長鄭耀棠早排做完頸椎手術，依家正慢慢康復。身為棠哥老友兼雀友嘅民建聯進出口界立法會議員黃定光（象哥）透露，棠哥手術後隻手依家叫做有番啲力，不過暫時仲未可以竹戰住，估計最快都要暑假先可以再次大殺三方喎。
棠哥同象哥喺內地都有物業，兩家人住埋附近，放假不時都會約埋竹戰。講起打牌，象哥希望大家唔好誤會，佢同棠哥並非爛賭之人，打嘅只係衞生麻雀，四圈起、八圈止咁話。佢好感慨咁話，自從棠哥發現頸椎出問題後，佢都開始注意自己身體健康，閒時會游水Keep fit，希望身體健康。
象哥仲話，有時扭吓條頸如果聽到有聲，都會擔心自己頸椎出問題，而且做頸椎手術其實一啲都唔平㗎，郁啲都成十幾廿萬，為咗保持身體健康，佢將來退休後會勤啲做運動，而且家陣佢喺中華出入口商會裏面已經冇處理會務，只係以顧問形式畀意見，壓力細咗，身體都健康啲。