政情：阿陶拋謬論撐搶咪男
社民連「搶咪男」黃軒瑋尋日喺《城市論壇》同青年民建聯主席周浩鼎正面交鋒，討論近期出現嘅衝擊高官現象，雖然之前有人喺網上留言話會搶番黃軒瑋支咪挫挫佢銳氣，不過呢個場面最終都冇發生。尋日所見，黃軒瑋畀周浩鼎撳住打，後來得到社民連主席陶君行親自教路，情況先叫拉勻少少。
節目上面，一向較少喺傳媒曝光嘅周浩鼎一開口就撻出大堆法律理論，身為律師嘅佢喺呢方面確係有啲着數，佢之後仲話，社民連喺邏輯上犯咗根本性錯誤，因為蕉係用嚟食，並唔係用嚟掟、陰司紙亦都唔係好似佢哋咁用㗎！黃軒瑋聽到即時怒火中燒，大聲講咗句：「陰司紙咪畀你呢啲人用㗎囉！」
講真，呢兩個政團由理念到行動方式都完全唔一樣，要傾出結論來根本就冇可能。最好笑係，陶君行見勢色唔對，即時就拉番六七暴動嚟講，話周浩鼎如果要聲討暴力，不如先返去問問自己「祖先」當年做過乜喎。雖然現場充滿火藥味，但最終都冇出事。