政情：金刀梁牛一自稱20歲
行政會議成員梁智鴻（金刀梁）愈活愈後生，今個月係佢七十三歲生日，點睇都唔似。咁啱佢做主席嘅香港愛滋病基金會都喺今個月慶祝成立二十周年，基金會尋日舉行創會二十周年紀念活動兼義工嘉許禮，金刀梁負責頒獎，同埋上台為基金會切生日蛋糕。司儀喺呢個時候就踢爆，原來金刀梁都係今個月生日，仲叫全場嘉賓唱首生日歌畀金刀梁聽，
得佢鬼咁開心，切完蛋糕仲講笑話：「我今年二十歲生日！」引嚟哄堂大笑。
金刀梁事後講番，原來基金會每年嘅周年紀念，都會「順便」幫佢慶祝生日，所以唔覺得驚喜，但就打趣話：「都好呀，趁機會有生日餅食，慳番唔使自己買。」佢又話今年生日都無咩大計同慶祝活動，淨係覺得又大咗一歲。
金刀梁尋日雖然係去咗頒獎，嘉許啲服務咗基金會好耐嘅義工，但原來佢自己本身都加入咗基金會二十年，結果有份獲頒二十年長期服務獎！頒頒下獎都可以攞到獎，金刀梁認真厲害！