政情：嫻姐擺高官上枱鋪路出山
工聯會副會長陳婉嫻近排非常活躍，喺好多唔同場合上都見到佢嘅蹤影，佢尋日又再出動，出席自己友工聯會立法會議員黃國健新辦事處嘅開幕禮。除咗嫻姐之外，勞工及福利局局長張建宗同運輸及房屋局副局長邱誠武都有畀面出席，兩位高官喺嫻姐銳利嘅詞鋒下，不知不覺間就畀人擺咗上枱，做嘉賓做到變咗幫工聯會同嫻姐宣傳嘅紙板公仔，認真搞笑。
尋日天公不造美，儀式進行到一半落起傾盆大雨，而當輪到張建宗發言時，一向世界仔嘅佢即時大讚落雨係天降甘霖，叫大家唔好介意，雖然局長識講嘢，但嫻姐點會咁易收貨吖。一直盛傳會參加超級區議會議席選舉嘅佢發言時問台下街坊，「大家覺得局長係唔係撐勞工同基層？」喺嫻姐號召下，即時群情洶湧，台下街坊個個拍手支持局長。
嘩！畀人狙擊就多啫，高官有幾何畀人讚呀？張建宗有見及此，即時起身鞠躬多謝支持。有人可能會問，做乜一向敢言嘅嫻姐變得咁擦鞋㗎？唔使擔心，嫻姐其實仲有後着。當班街坊拍完手叫好後，嫻姐即時話，今日到場前睇新聞，見到自由黨搵埋成班僱主聲討最低工資制度，即時眼火爆，希望在場街坊記得撐局長企喺勞工一方，同埋要撐支持基層嘅政團。
黃國健話阿姐唔逼得
張建宗聽到嫻姐咁講，面色即時一沉，不過礙於形勢又唔可以反駁喎，情況相當有趣。擺得一個上枱，唔爭在擺埋第二個，嫻姐繼續話，希望現場街坊都支持邱誠武復建居屋，因為呢個係社會共識喎。現場街坊聽到，即時大聲叫好。唔使講，邱誠武唯一可以做嘅又係保持緘默，只係識得尷尬苦笑。
嫻姐幾吓散手，就搞到兩位高官變咗自己嘅宣傳工具，呢啲咪係經驗囉！佢事後話，自己只係想叫張建宗撐住，唔好畀商界講幾句就轉軚。佢又希望商界講道理，唔好將勞工界講到貪得無厭。不過當畀人問到會唔會復出，嫻姐即時封嘴，叫大家唔好再逼佢，再逼佢就打退堂鼓。黃國健就話，阿姐唔逼得，只可以慢慢燉。觀乎嫻姐尋日表現，幾句說話就令兩個高官被迫為佢鳴鑼開路，話佢唔復出真係冇人信！