中環出更：莊吳時「新歡」進佔衣櫃
自從潮州商會永遠名譽會長莊學山投資社企「L Plus H」，瞓身打造香港製造高檔時裝品牌之後，莊太莊吳時就好唔得閒喇！因為佢身為品牌董事局成員，幾乎全情投入幕後工作。佢仲好鍾意演繹自家品牌靚衫，笑言其他牌子嘅衫已被打入冷宮。
鍾情自家品牌
早前卓妮喺「L Plus H」活動見到莊太，佢着咗件銀灰色針織薄身外套，唔使講，梗係自家品牌啦！莊太笑言，依家除咗「L Plus H」出品之外，都唔知着咩衫好。「L Plus H」創立啱啱夠兩年，但係佢屋企嘅衣櫃已被呢個新歡佔咗兩成空間，都咪話唔犀利。
莊太盛讚當日着住嘅針織外套好舒服，最啱夏天穿着。佢鍾意件衫閃令令嘅銀灰色，無論出席正式或輕便嘅場合都啱，方便佢日與夜出席唔同嘅畀面派對，唔使換裝咁麻煩。計卓妮話，下次佢哋再搞時裝騷，不如搵莊太親自上台行吓貓步吖！