中環出更：眼傷未愈 田少唔敢歐遊
早前出海遇險嘅旅遊發展局主席田北俊好彩執番條命，但係撞親頭搞到雙眼睇嘢有疊影，就抖咗兩個多星期仍未有好轉，田少唔擔心就假。佢依家連行路都要好小心，更遑論揸車，更加唔可以去歐洲自駕遊。歐遊大計取消，佢上星期本來約咗班「團友」聚餐商討行程，聚會變成老友對佢嘅慰問大會，都幾掃興。
過去兩年暑期，田少都以團長身份帶隊揸保時捷歐遊，熱愛賽車嘅東華總理黃業光（John）都係鐵腳之一。兩人早就預算今年五、六月出發，再征西班牙，田少出事，歐遊大計被打亂。
戴特製鏡仍有疊影
上周三，田少約埋十幾位團友，去尖沙咀德國餐廳Biergarten食晚飯。見佢由田太攙扶到來，落樓梯時顯得小心翼翼，老友見到田少，紛紛上前慰問。副團長阿John話等埋田少先出發，叫佢安心休息，其他團友亦一呼百應，決定將行程押後至今年底或明年初，大家都算有情有義。團友咁齊心，田少都放開懷抱，柯打羊扒擦餐勁。唔少老友喺席間都建議佢睇唔同嘅醫生，有人就認為佢可以試吓針灸。
田少早前喺自己隻遊艇上遇到大浪被拋到半空中再跌落甲板，一度不省人事，佢跌斷咗左手拇指，雙眼睇嘢有疊影。醫生原本話佢腦有水腫所以睇嘢出現疊影，點知水腫已消，疊影仍在。田少聽醫生建議配咗副眼鏡，戴咗眼鏡後，向前睇嘢有好轉，但向左、向右同向下睇嘢都仍然有疊影。田少話，好動嘅佢現時不能揸車，不能打波，行路都要慢啲，都幾悶。
卓妮