政情：港大民調被冒認播毒
隨住互聯網日益普及，市民不時都收到一啲冒認大銀行、慈善機構或政府部門發出嘅電郵，藉此呃市民錢、盜取市民嘅個人資料，或者單純散播電腦病毒搞搞震。最新嘅受害者竟然係俗稱港大民調嘅香港大學民意研究計劃，畀人冒認發出電郵散播電腦病毒，最後搞到要出稿澄清，認真無辜。
港大民調日前發表聲明，並非公布班高官民望又跌咗幾多個百分點，而係澄清一個假冒由佢哋一名研究員發出嘅電郵，同港大民調完全無關，佢哋根本冇請過一位咁嘅人。該虛假電郵聲稱正計劃進行一項有關「互聯網對香港政黨和社運影響的最新發展」嘅研究，要求收件者下載同打開附件畀吓意見，但其實一打開電郵，部電腦就會中毒，非常陰濕。
呢位發件人好揀唔揀，選擇冒認港大民調發電郵播毒，某程度都顯示到港大民調有番咁上下公信力，能夠令市民信服而打開電郵，所以民意研究計劃總監鍾庭耀毋須太過勞氣。