政情：梁劉柔芬「啞仔食黃連」
審計署報告揭發東亞運公司財政混亂，當初不斷埋怨唔夠錢做嘢，周圍揼人心口，已令不少人士有所怨言，如今東亞運錄得巨額盈餘，竟然又喺冇諮詢下充闊佬捐晒出去，難怪有份豪捐六百萬嘅廠商會議員林大輝要求回水。不過，另一被揼心口嘅苦主、經濟動力議員梁劉柔芬（Sophie）就啞仔食黃連，好大方話無乜所謂喎。
Sophie承認自己有捐過錢畀東亞運公司，但數目已經唔記得，又聲稱唔知佢老公足總主席梁孔德有冇份捐錢。佢直言，自己一年捐多次錢，通常都「前腳踏、後腳放」，唔會再同對方計較。對於大輝喺審計報告出台後氣憤難平，Sophie就笑言大輝只係做吓戲咋喎。如果大輝真係做戲，咁呢場戲又幾逼真喎！
其實Sophie當初非常反對港府申辦東亞運，佢曾經講過港府有幾多錢就用幾多，唔好再叫人捐錢，可見Sophie對東亞運公司嘅做法頗有微言，可惜政府堅持充闊佬，全無歉意。