政情：民記領導層大換血
民建聯尋日改選領導層，選出新一屆五十名中央委員。睇番張名單，當中有幾個新名字，好自然就令人聯想到係民記未來力捧嘅對象，好似已故進出口界立法會議員許長青嘅公子許華傑、立法會議員陳克勤、新界社團聯會常務副理事長陳勇及現任觀塘區議會議員陳百里咁，個個都將有機會更上層樓。
許華傑來屆會代替黃定光出選立法會進出口界別議席，已經係人盡皆知嘅「秘密」，今次佢正式進身民記管理層，話唔係同選舉有關都冇人信。至於喺新界東出選嘅陳克勤，坊間一直盛傳佢下年立法會選舉會自己組隊參選，今次做中委相信都係要提高佢嘅地位，以增加勝算。
有新人加入，自然就要舊人退落嚟，當年民記同港進聯合併，好多港進聯高層都過渡做埋民記嘅管理層，但長江後浪推前浪，一啲大佬級人馬，好似副主席溫嘉旋及常委曹王敏賢等等都冇再連任。