政情：立會暑假搬竇未落實
我哋早前報道過，由於要符合國家最新嘅防震建築標準及其他原因，令添馬艦新政府總部及新立法會大樓工程出現延誤，立法會有可能會由原定今年暑假搬屋，押後到聖誕假期先搬到。此舉意味將於明年七月任滿落台嘅煲呔曾，可能無緣喺新大樓宣讀最後一份施政報告。
最驚承建商將貨就期
立法會行政管理委員會尋日舉行閉門會議，聽取秘書處匯報最新嘅工程進度，據聞仲有個別工程落後於原定施工時間表，但承建商已承諾加緊趕工，應該可以喺餘下時間追回進度，令立法會可以趕及喺暑假搬遷，喺新大樓展開新一個立法年度。
不過，有委員表示，任何有搞過屋企裝修工程嘅人都知道，承建商嘅承諾真係只能信住先，一日未交樓都未能鬆一口氣，所以對暑假搬屋計劃只能抱審慎樂觀態度。又有委員話，立法會最驚承建商將貨就期，等佢哋搬到入去先發現甩漏多多，如果真係趕唔切，不如聖誕節先至搬，反映最心急嘅唔係班議員，而係煲呔曾囉！