政情：葉劉寸爆警方亂收風

立法會前晚喺一片炮轟聲中低票通過「史上最廢」預算案，但立法會大樓外嘅情況，就令當局大失預算。前日朝早只有幾名極和平嘅社民連後生仔到場靜坐，晚上更只見示威常客「女長毛」雷玉蓮，帶埋一個貼上財政司司長鬍鬚曾肖像嘅吹氣公仔到場示威。見成班警察冇嘢做圍住女長毛同個吹氣公仔鬥兇，真係令納稅人唔知好嬲定好笑。估計連見慣大場面嘅女長毛，亦會多少感到受寵若驚。

上月衝突甩轆 心急補鑊

事後有人估計警方係因為喺上月初嘅反預算案衝突中甩轆，又跌槍又亂噴胡椒噴霧，所以心急補鑊補過龍。亦有人揣測警方係受咗來自某方面嘅政治壓力，或者班高層掛住擦鞋，先至明知戇居都要咁做。不過，做過保安局一姐嘅葉太就有另一套睇法。

葉太指出，正常警方應該係根據收集到嘅情報，估計到時會有幾多人同有乜人示威搞嘢，然後作出相應嘅警力同行動部署，按早兩日情況睇嚟，警方明顯係收錯風。佢又話，啲示威者想搞嘢，尤其係想發動有大批人參與嘅活動，必須要透過各種網上工具「吹雞」，唔好話擁有超級電腦嘅警方，就算普通小市民求其攞部手機上網，都可以輕易獲取有關資訊，知道有冇人想搞嘢同搞緊嘢，冇理由擺出咁大個烏龍，警方今次真係要好好檢討。

講開女長毛，尋日有網民喺youtube上載咗一段短片，拍攝咗星期三晚立法會暫停會議後，女長毛由立法會示威區「放工」搭港鐵番屋企嘅情況。片中所見無論女長毛去到邊，都有兩至三名貌似便衣警員嘅男子，喺佢幾呎範圍內跟住。拍攝短片嘅網民問佢哋跟住人做乜，佢哋就擰轉面行開一陣，但轉過頭又跟番埋嚟，極度尷尬同搞笑。今時今日當差真係唔容易，尤其係跟着班戇居嘅老細！