近期喺政壇冒起嘅新任屯門鄉事委員會主席何君堯（Junius），早幾日以屯門區議會當然議員身份到古蹟景賢里考察，此行仲有廿幾位其他區嘅區議員，當中包括離島區委任議員、鄉議局主席劉皇發個女婿余漢坤（Randy）。之前一直有傳Junius同發叔為咗爭奪鄉委會主席搞到面左左，但當日Junius同Randy合照時就搭晒膊頭，仲上載到社交網站facebook，莫非想闢謠？
Junius話，唔理外人信唔信都好，佢同發叔真係完全冇隙嫌，發叔作為前輩一直好照顧同提攜佢，而且佢同發叔嘅家人亦識咗唔短日子，大家嘅關係唔錯。不過，自從佢同發叔鬧翻嘅報道出街後，每次喺公開場合見到發叔家人都覺得唔好意思，面懵懵咁好尷尬喎，佢話：「唔想講太多喇，費事愈描愈黑，發叔係長輩點會同後輩計較吖！」
談及近期嘅工作，身兼律師會副會長嘅Junius話，今次參觀景賢里，成個屯門區議會得佢一個去，但冇所謂啦，事關今次係個好機會畀佢認識其他區議員，而且參觀完景賢里後，佢對點樣保育文物有另一番體會，仲話會思考吓點保育屯門嘅古蹟喎。