中環出更：慈善高球賽政商名人過招
政商界有唔少高爾夫球好手，尋日齊集深圳觀瀾湖較勁，為「龍傳基金」慈善高球賽籌款。保安局局長李少光、滙豐亞太區行政總裁王冬勝（Peter）及中策集團主席馬時亨向來係「鐵三角」組合，合作無間，但今年就拉埋「深圳王」全國政協委員黃楚標落場，四人鬥波兼鬥嘴，捉住「疑似」未來財爺Peter開玩笑，嚇到佢連聲否認。
高球賽吸引逾百位好手參加，分成近三十隊較勁。李少光、Peter、肥亨及黃楚標合組一隊，雖然同坐一條船，但牙骹戰少不免。肥亨撩標哥鬥波，標哥自嘲水皮，笑言四人當中，佢球技排最尾，所以拍心口包晒球僮費，請三位老友打波，認真客氣。
肥亨「小鳥」笑足全場
Peter就被公認好波之人，三兩下手勢就捧走「男子組最近洞獎」。卓妮趁佢開心，追問佢係下屆熱門財爺人選單嘢，Peter即時澄清話：「唔好亂講，一定唔係。」完成賽事後仲急忙趕返香港，由隊友標哥代佢領獎。
曾試過一桿入洞嘅肥亨都唔失禮，打出「小鳥」（低於標準桿數一桿）。肥亨冇獎攞，但佢話場波打得好開心，邊打邊鬥嘴，笑足十八個洞，happy到極。同肥亨一樣無獎攞嘅，仲有試過「三年抱兩」三年內兩次一桿入洞嘅李少光，光哥成場波都好靜局，專注打波。
數明星波友，仲有金利來太子爺曾智明太太黎瑞恩，小恩子球技精湛，勁過唔少猛男，佢一度將波打入樹林，三扒兩撥搵番個波，打番出嚟，執生本領奇高。
卓妮喺球場仲見到歌星林子祥及區瑞強，仲有導演石天。原來林子祥「波齡」都有三十幾年，九七年曾經打過一次一桿入洞，至今諗起都興奮，所以表現得有板有眼。
今次擔任高球籌委會主席嘅觀瀾湖太子爺朱鼎耀（Tenniel）一如往年落場打埋一份，Tenniel曾拜師多位世界頂尖球手，揮桿入洞，隨心所欲。結果，佢不負所望，獲得個人淨桿獎及隊制淨桿獎。
卓妮