增加汽車首次登記稅是否有助改善塞車尚有爭拗，不過，運輸及房屋局提交的檔案指出，去年共有九千零八十五輛轉售用的進口二手私家車抵港，較○六年急升兩倍。
很明顯，政府提高汽車首次登記稅百分之十五，根本無助遏制汽車數量增長，反而鼓勵更多港人利用進口二手車避稅。此次加汽車稅，報上翻開煲呔曾十一年前塵封的臭史。
當年煲呔曾貴為財政司司長，在英國買了一輛全新平治S320L豪華房車，「落地」冇耐於同年運港自用。煲呔曾事後解釋「香港好多人都係咁樣做，最緊要係買到平嘢」。其時，不少學者質疑他的說法，老朽認為當年是中大亞太研究所副所長的劉兆佳批評得最到肉，佢話煲呔曾嘅做法係盡顯其「香港仔心態」。
好一句「香港仔心態」！何謂「香港仔心態」？要言之，就係走精面，怕蝕底，執輸行頭，慘過敗家，「一切以謀取個人利益作依歸」。這種「合法避稅」的走精面，煲呔曾即使不是始作俑者，也起「示範」作用。
一個社會若人人都有走精面的心態，這個社會必失去公平與正義，不安的因素就會隨懸浮粒子飛，蓄積到一定能量後，自然就爆發成強大的破壞力。做官的，不必都「先天下之憂而憂」，然而，心中無愛有私，試問怎有機會建構和諧、溫暖的社會？
十一年彈指一揮，港人依然發揮此種「香港仔心態」，長官深種的「一切以謀取個人利益作依歸」仍在開花結果，記得八吓何處有平嘢！