政情：港強積金被批遜獅城
香港經濟發展前路茫茫，反觀鄰近新加坡，改革路向愈見進取。廠商會會長黃友嘉（David）都向獅城借鑑，上周二率團考察新加坡三日，拜會咗新加坡中央公積金局及建屋發展局等部門，啟發良多，佢大讚當地強積金制度靈活，行政費低，正過香港多多聲，所以希望港府改善強積金制度。
David發現，獅城強積金供款比例較香港高，僱主供百分之十五點五，僱員就供百分之二十，相比香港僱主及僱員各供百分之五，好似冇咁着數。不過，睇真啲獅城政府容許市民可以動用供款醫病或買醫療保險，甚至買樓都得，彈性大好多。唔單止咁，當地市民可選擇將強積金交由政府管理，免收管理費之餘，仲有保證回報，市民都樂意供多啲。
獅城除退休制度完善之外，仲近乎全民置業。David話，平均九成五人口買到樓，當中有七成五人住喺千呎大屋添！咁講法，香港人窮一生都儲唔到首期買樓，港府施政又軟弱無能，真係移民新加坡好過囉。