香港地產建設商會尋日舉行第廿四屆會董會首次會議，出任會長長達四分一個世紀嘅「賭王」何鴻燊功成身退，卸任會長，由前執行委員會主席簡基富接任，第一副會長就由新鴻基地產副主席兼董事總經理郭炳江擔任，其他副會長包括長實集團主席李嘉誠、新世界發展主席鄭裕彤、恒基地產主席李兆基、合和實業主席胡應湘、恒隆地產董事長陳啟宗同信和置業主席黃志祥等。
燊哥嘅地位、經驗同影響力都難以替代，之前佢病重入院，其他商會成員都無意另行改選會長，等佢依家恢復健康同搞掂晒啲家事之後，先至作出今次變動。簡基富尋日就喺新聞稿內，大讚燊哥喺過去四分一個世紀領導商會，令商會成為業界發聲嘅翹楚。
為咗感謝燊哥咁多年來對商會嘅貢獻，會董會成員一致決定邀請燊哥擔任永遠名譽會長。
執委會方面，原副主席新世界發展首席顧問梁志堅「坐正」做主席，副會長黃志祥兼任執委會副主席，再加上其他十七間地產商代表。所有會長、副會長，同埋執委會嘅正副主席，任期都係兩年。