政情：何君堯打完發叔打發仔
立法會議員個人利益監察委員會尋日發表報告，放生漏報公司股權利益嘅鄉議局主席劉皇發，但佢喺鄉郊辣着嘅火頭未見減退。成功取代發叔做屯門鄉事委員會主席嘅律師會副會長何君堯，近日轉移戰線打算競逐屯門區議會正、副主席選舉，除咗硬撼發叔個仔劉業強外，更與另外兩名同屬鄉事派嘅議員正面交鋒，民建聯就翹埋雙手等睇戲。
我哋早前寫過，發叔失落屯門鄉委會主席，連帶屯門區會當然議員及主席資格都無埋，傳聞話佢有意推舉做委任議員嘅兒子劉業強「子承父業」角逐區會主席，等佢下屆經政府委任重返區會後再接番個位。不過，世事邊有咁如意吖，屯門區一直由民建聯佔多數，過往大家尊重發叔嘅江湖地位，先至肯讓路畀佢做主席，但現時發叔人走茶涼，民建聯自然要攞番個位，決定推舉己黨嘅現任區會副主席梁健文「坐正」。
民記翹埋手等睇戲
不過，民建聯喺嚟緊嘅區議會同立法會選舉，始終都要同鄉事派合作，所以唔敢去到咁盡，點都讓番個副主席位畀鄉事派。據聞四個有鄉事背景嘅人都想爭做副主席，包括劉業強、何君堯、以及兩名民選區議員蘇炤成同古漢強，當中以前兩人呼聲較高。
有民建聯中人話，眾所周知何君堯有意染指立法會新界西直選，最近不斷喺地區招兵買馬，其中兩名樁腳更計劃喺區選挑戰民建聯現任議員，令該黨好唔高興。不過，民建聯都唔想過分介入鄉事派嘅內部鬥爭，希望對方喺五月初區會正、副主席改選前協調好一名人選，若然最後協調出何君堯，就寄語佢要「識做人」，要學民建聯咁凡事唔好去到咁盡，否則民建聯好難投票支持佢喎。
除咗屯門區，離島區同葵青區議會亦因為現任主席落選鄉委會而需要改選，其中離島區因為鄉事派佔多數，來自民建聯嘅現任區會副主席周轉香應該冇得「坐正」，預計由南丫島鄉委會主席周玉堂「直升」區會主席。葵青區就因為當區嘅民建聯及工聯會傾唔掂數，令到工聯會現任區會副主席麥美娟亦無緣再上一層樓，可能最終由C18嘅委任議員方平冷手執個熱煎堆上位都未定。