中環出更：雷林靜怡護膚唔用日本貨
女人肌膚值千金，揀護膚品，絕對不能馬虎。雖然日本核輻射災難未蔓延至護膚品，但見到日本災情咁壞，一眾貪靚嘅女士們都咪話唔驚。不過，據聞城中名媛多數選用歐美化妝品牌，所以唔驚核輻射危機，反而著名工業家蔣震千金蔣麗芸（Ann）就係日本護膚品擁躉，依家十五十六都未知係咪轉用其他國家嘅護膚品牌。
九巴新抱雷林靜怡（Jane）皮膚一向絕頂好，即使生咗三個小朋友，皮膚依然白滑有光，想喺面上搵條皺紋都難。卓妮日前行經中環歷山大廈間COVA，見佢同大仔High tea。阿Jane早前逃過九級地震一劫，心情已平復，問佢驚唔驚日本護膚品有輻射，佢就擰頭話唔擔心：「我用開LA MER，始終係外國貨，有信心好多。」
卓妮八到，LA MER係美國品牌，四十多年前出自太空物理學家之手，產品標榜來自深海海藻，成分天然，怪唔得阿Jane一試傾心。
Ann蔣轉品牌心大心細
追捧歐洲護膚品牌嘅，仲有「健康快車」創會主席方黃吉雯。小吉話，向來唔多用日本護膚品，堅持用歐洲貨，係邊隻牌子就唔講嘞。咁講法，大家係咪應該倣效小吉，轉用外國貨呢？咁又未必喎，小吉話，大家毋須大驚小怪，關心核輻射事件之餘，毋須事事過分擔心，太過杞人憂天會好易令自己唔開心喎。小吉咁樂天，難怪歲月喺佢面上，不留一絲痕迹。
不過，阿Ann就用開日本護膚品，使用多年，美肌效果唔錯，但佢睇見核事故咁得人驚，都話有啲擔心，暫時未決定係咪轉用其他國家產品：「好彩我買定幾樽，屋企仲有存貨，應該仲有排用。」一句講晒，睇定啲再算。
卓妮