政情：張炳良暗寸港大晒命
香港大學日前公布新一年畢業生嘅薪酬調查，呢班職場初哥平均月薪超過一萬七千多元，其中一名畢業生更因投身私人投資公司「代客炒樓」，未計佣金已月入十萬，成為同期畢業生嘅「打工皇帝」。報道出街後引起社會激烈討論，身兼教育學院校長嘅行政會議成員張炳良，就暗寸港大呢種「晒命」行徑，認為呢類調查冇乜必要做喎！
張炳良尋日出席完行政會議後直言，明白社會及一眾家長都對呢類畢業生嘅薪酬調查有興趣，導致大專院校做呢類統計亦在所難免，但佢個人就覺得呢類調查冇乜必要，事關各行各業嘅人工同待遇都唔同，亦相信學生唔係為咗份人工而入學。
徐立之懶理批評
被張炳良隔空暗寸，港大校長徐立之尋日出席公開活動時，就強調呢類畢業生薪酬統計係恒常做法，仲強調好多市民、家長同學生都好關注，未來亦會繼續對外公布喎！徐校長又話，今年畢業生之所以人工高，主要受惠於經濟環境好轉，所以大家睇嘢要睇長遠啲喎。