中環出更：張建東談癌病感同身受
癌病可怕，但回首政壇，有唔少抗癌勇士，好似患血癌康復嘅行政會議成員張建東（Marvin），就係最佳例證。講起商務及經濟發展局局長劉吳惠蘭（Rita）患上第三期腸癌辭職，Marvin話，自己係過來人，明白抗癌之苦，奉勸大家珍惜健康。
親情擊退血癌
Marvin尋日現身香港會所食晏，見佢精神奕奕，臉色紅潤有光，健康指標Fit到極。對於Rita患腸癌，Marvin都大表同情，佢話高官工作壓力大，Rita要辭職抗病，佢都好理解喎，事關健康最重要嘛。
咪睇Marvin依家肥肥白白，查實佢○六年發現患上急性血癌時，曾放下工作去美國接受治療，佢除咗得到太太悉心照顧外，佢兩位千金亦停薪留職，飛埋去美國陪伴左右，一家人齊心抗癌八個月，終於擊退癌魔。Marvin話，親情畀佢好大力量。原來今次Marvin擊退癌魔，醫藥費高達近八百萬港元，所以話健康係無價嘅。
卓妮