政情：楊華勇愛環保小車
環保生活成為潮流大趨勢，由生活小事做起，自然可以為環保出分力。好似全國政協常委楊孫西兒子楊華勇（Johnny），平時衫褲鞋襪都唔會瘋狂咁買，加上平時工作都係着西裝居多，簡簡單單，奉行簡約生活。至於平時代步嘅汽車，Johnny最近就迷上環保小型電動車，仲心思思想買番部添！
Johnny早前跟隨廠商會去科學園參觀，即刻被新研發嘅環保小型電動車吸引，佢大讚揸落夠晒寧靜，操作上同一般汽油車輛分別唔大，而且馬力都唔差，一度令佢扑錘想買番部，可惜當時未有得賣住，只可以租嚟揸吓過手癮，但佢近日有冇再嘗試買呢部車就不得而知喇。
不過，好多成功男士都喜愛大馬力跑車，Johnny都唔例外，閒時鍾意揸有速度感嘅跑車，至於邊款車佢就好低調唔肯講，但佢深明大馬力跑車耗油量大，都會盡量少啲揸，總之喺環保同娛樂之間取得平衡喎。