政情：阿季重返社記觸礁
前社民連秘書長季詩傑早前同創黨元老黃毓民翻臉黯然退黨，但其後毓民自己亦拉隊退埋黨，阿季即時諗住回巢，希望同班經歷完巨變嘅前黨友重新合作，一齊拚搏。只可惜神女有心，襄王無夢，社民連前晚召開行委會，高票否決阿季嘅重新入黨申請，最後大家仲不歡而散添。阿季話不滿社民連冇提供拒絕佢入黨嘅合理理由，以後都唔會再提出申請，又話雖然心有不甘，但總好過「浪費感情」喎。
社民連副主席吳文遠就話只係暫時唔接受阿季嘅入黨申請，佢及後都可以再申請過，不過都要經行委三分二多數支持。佢冇明言點解阿季回巢失敗，只係話黨內仲有人對佢好有意見，所以先暫時作罷。
有社民連成員估計阿季今次係衰在太心急，冇同黨內兄弟解釋為何去而復返，搞到唔少人以為佢想撈油水，參選嚟緊嘅區會及立會選舉。亦有人覺得阿季之前喺黨爭情況最惡劣嘅時候離去，唔夠忠誠。加上阿季成日都拎番以前同毓民爭辯嘅事嚟講，正所謂崩口人忌崩口碗，冇人想再舊事重提，影響黨內和諧，所以將阿季拒於門外。