政情：李本瀅四寶度餘生
知足常樂，生活簡簡單單都可以好開心寫意，經常探究大自然現象嘅天文台台長李本瀅就深明呢個道理。好多人都會諗吓退休後點樣歎世界，而將於本周三正式退休嘅李本瀅都有諗過退休生活，發覺原來一個有瓦遮頭嘅竇口、一個老伴、一個書櫃、半樽酒已經足夠伴佢度餘生，真係簡單又實際。
原本一心諗住無驚無險等退休嘅李本瀅，臨退休前就畀日本核輻射問題搞到周身唔得閒，佢尋日出席電台節目時有感而發話，日本核事故令社會更關注推動再生能源問題，仲語重心長叫市民改變生活模式，減少浪費，又強調自己退休後都會奉行簡單嘅生活。
究竟生活可以有幾簡單呢？李本瀅話：「我哋消費其實太犀利，你睇吓有幾多廚餘、幾多廢物，一個人需要幾多呢？其實需要好少之嘛，你計一計卡路里，好可能一日食兩餐已經足夠，根本唔使三餐咁多添！」佢又話，退休後唔會從事賺錢嘅工作，希望做啲同教育和慈善有關嘅工作，貢獻社會。